Txiv Thiab Txiv
Tus sau: Nyiajlis Thoj 2011
Kuv los yog txiv
Koj los yog txiv
Txhua yam txiv coj ces koj yeej qiv
Txiv tsis xav nrog koj sib cam mus wiv
Txiv hlub nej tas los hlub thiab
Txiv yws nej los txiv yeej tsis ntiab
Txiv hlub nej los puag nruab thiab
Niam nqis dabtsi txiv thiaj nrhiav log chiab
Koj hlub koj cov nyuag puas yog li no thiab?
Koj puas hlub tus hlob txog tus mos liab?
Koj kev hlub puas yog txhawv tuaj nruab siab?
Los koj lam wias kom koj tej me nyuam kiab?
Txiv hlub nej ces txiv hlub txhua tus
Ib yam li koj hlub tej nyuag uas yog koj yug
Koj yeej tsis kheev ib tug mus ua neeg qus
Koj yeej hlub lawv ua ntu zus
Txiv hlub nej ces txiv hlub txhua leej
Ib yam li koj xav kom koj cov nyuag yeej
Koj yeej tsis cia ib tug puas koob poob meej
Koj yeej hlub kom txhua tus muaj neej
Txiv tsis tas piav ntau
Vim koj yeej hlub tus hlob txog tus yau
Koj yuav ua cas muab wb txoj kev ua txiv los sib nrau
Tus qauv leej txiv ces wb yeej ob leeg siv muaj chaw rau
Txiv tsis tas piav wiv
Vim koj yeej paub txog txoj kev hlub tub tu kiv
Koj yuav ua cas muab wb txoj kev ua txiv los sib piv?
Tus qauv leej txiv ces wb yeej ob leeg siv
Niam Thiab Niam
Tus sau: Nyiajlis Thoj 2011
Kuv los yog niam
Koj los yog niam
Wb hlub tub ki yeej tsis muaj kiab kiam
Koj hais tsis tau tias kuv hlub lwm tug es tseg koj
Vim koj yeej hlub tus yau txog tus loj
Koj yeej nrhiav rau txhua tus noj
Koj hais tsis tau tias kuv hlub tub es tseg whais
Vim koj hlub koj cov nyuag dua ntais
Koj noj txhua yam koj yeej tsis zais
Koj hais tsis tau tias kuv hlub whais es tseg tub
Vim koj hlub koj cov nyuag tas hnub
Koj yeej tsis cia lawv tej tsoos tsho qub
Koj hais tsis tau tias kuv hlub tub es tseg nyab
Vim koj yeej totaub txog kev mob plab
Kuv tsis yug koj los kuv yeej taug tau koj niam qab
Koj hais tsis tau tias kuv hlub nyab ces tseg tub
Vim koj yeej hlub koj cov nyuag txhua hnub
Tus kuv yug es kuv yuav ua cas wub?
Thaum koj tobtaub li hais los no
Koj yuav jib txoj kev kaj siab hlo
Koj yuav tsis muab wb txoj kev ua niam los sib do
Thaum koj totaub li tau teev
Koj yuav jib kev kaj siab es tseg txoj kev seev
Koj yuav tsis muab wb txoj kev ua niam los sib weev