Lus qhia: Zaj no yog ib tug meyes Edison High sau. Tsis muaj be ces tsis paub tias yog leej twg li lawm.
Tus uas lees them luag lwm tus tej nqi es nws ho tsis them, puas ua teebmeem rau nws? Nov txhais tias, nws los tsis them thiab tus tshuav nqi lost sis them. Zaj uas kuv yuav sau no, nws ua teebmeem rau tus lees uas tsis them: tsis yog tiam no, tiamsis tiam tomntej. Kuv yuav qhia nej txog tiam txais nyiaj thiab tiam them(pauj) nyiaj peb rau nej tau kawm.
Tiam txais nyiaj, Txoos Tuam tau txais 2 meem nyiaj (20 choj nyiaj) ntawm ib tug neeg. Ntev tomqab ntawd, Txoos Tuam pheej tsis them cov nyiaj no rau tus tswv. Tus tswv thiaj mus cuag Txoos Tuam ib tug kwvtij uas hu ua Peem kom nws pab hais Txoos Tuam. Peem thiaj hais khav wias tias nws mam hais Txoos Tuam thiab yog nws hais tsis tau Txoos Tuam los nws mam lees them. Tsis ntev tomqab, Peem tsib tsis tau cov nyiaj thiab nws cia li tuag lawm. Tus tswv tsib pes tsawg los Txoos Tuam pheej tsis them, nws thiaj hais tawm tias yog Txoos Tuam tsis them ces thaum kawg nws yuav mus tsib Peem rau lwm tiam.
Tiam them nyiaj, Peem rov los yug ua neeg loj hlob thiab mus yuav poj niam. Gawv ob niamtxiv pib ua neej thiab pib yug me tub menyuam. Gawv cov menyuam muaj 4-5 xyoos ces pheej mob nthawv nthav li 1-2 hnub ces tuag kiag lawm. Vim nws tej menyuam pheej tsis loj hlob thiab nws nco lawv heev, nws thiaj mus hu txiv neeb tuaj ua neeb saib. Tus txiv neeb thiaj saib pom tias nws cov menyuam uas tsis loj hlob ntawd yog tus neeg uas nws tsuav nqi tiam tas los. Qhov uas cov menyuam pheej tsis loj hlob yog tus neeg rov los tsib nws cov nyiaj. Txiv neeb hais wiv tias nws yuav tau ua siab loj thiab txhob quaj, txhob nco cov menyuam lawm. Yog hnub tug gawv rov yug tau ib menyuam es nws mus raws tus lwjlwm qub ces Peem yuav tsum mus hu muam phauj tuaj tsawm, ntau cim rau, thiab cem nto kom txhob rov los lawm. Ib lub sijhawm ntawm, Peem yuav tsum hlawv xyab hlawv ntawv ntau’ rau tus menyuam ntawd. Tsis ntev tomqab, tus xwm txheej thiaj rov tshwm ces Peem thiaj ua raws nraim li tus txiv neeb tau qhia. Txij li ntawd los, gawv ob niamtxiv thiaj yug tau menyuam thiab tej menyuam thiaj loj hlob, tsis tuag lawm.
Peem qhov teebmeem yog nws lees them Txoos Tuam qhov nqi tiam tas los, tiamsis nws tsis muaj caij them thiab tsis muaj caij tsib Txoos Tuam vim nws tso lub ntiajteb tseg. Thaum nws rov los ua neej rau tiam tomqab, nws thiaj tau them tus nqi los ntawm txoj kev menyuam tsis loj hlob thiab txoj kev nyuaj siab wov plawv. Thaum kawg nws thiaj tau thov muam phauj tuaj tsawm thiab hlawv xyab ntawv ntau’. Zaj no qhia rau peb tias peb txhob lam mus lees them luag tej qhi. Yog luag tsis them ces peb yuav tau them tiam no lossis lwm tiam.