Yaumseej muaj ob hom kev sau:
- Yaumseej (persuasive essay): Yaumseej los ntawm lolus yaum thiab seej. Yaum kom seej los tuaj yus seem.
- Camtheej (argumentative essay): Camtheej los ntawm lolus cam thiab theej. Cam kom theej(hloov) los tuaj yus seem.
Zajlus yauseej yog yus hais yus seem xwb, hos zajlus camtheej mas yus hais yus seem thiab hais luag seem tibsi, tsuas yog yus taw tias yus seem zoo dua/yog dua.
Zajlus yaumseej
Kev Sim Tshuaj Rau Tsiaj
Txoj kev sim tshuaj rau tsiaj muaj nujnqis rau tibneeg kev nyob zoo (health). Peb tsis jib tus kab mob tuag tes tuag taw (polio) vim peb muaj cov tshuaj tivthaiv (vaccine) uas raug sim rau tsiaj. Ntau yam tshuaj uas peb tau siv puav leej yog cov tub txawg (scientists) muab sim rau tsiaj uantej. Yog li, peb tsimnyog siv tsiaj los sim tshuaj pab tibneeg lawm yam tomntej.
Yuav kom cov tub txawg ua tau tshuaj tshiab, lawv yuav tsum sim tej tshuaj ntawd. Cov tub txawg yeej tshawb pom tias ntau tus tshiaj cov roj tsha khiav dejnum li tibneeg li. Saib cov tshuaj tshiab ua dejnum li cas rau tsiaj ces lawv paub tias cov tshuaj ntawd yuav ua dejnum ib yam rau tibneeg.
Kev muab tshuaj sim rau tsiaj pheej yig. Cov Tub txawg muaj peevxwm yug tau tsiaj ntau los sim tshuaj. Lawv cia cov tsiaj li nas thiab lwm yam yug menyuam rau hauv qhov chaws sim tshuaj thiab tu lawv rau hauv yoojyim.
Kev sim tshuaj rau tsiaj pab tibneeg txoj sia. Nws yuav tsis zoo sim tshuaj ncajnraim rau tibneeg vim tibneeg yuav raug tuag thaum cov tub txawg tsis tau paub cov tshuaj meej. Thaum muab nug los (survey), 99% ntawm cov nrauvtawj(Dr.) Mekas teb yeej hais tias txoj kev sim tshuaj rau tsiaj tsim ntau yam tshuaj los pab tibneeg. Tseeb tiag, 97% ntawm cov nrauvtawj yeej tseem pheej txhawb txoj kev sim tshuaj rau tsiaj.
Txoj kev sim tshuaj rau tsiaj yuav tsum muaj mus wiv vim nws tsis ua teebmeem rau tibneeg, pheejyig, thiab yoojyim tu(maintain). Cov nrauvtawj los yeej txhawb txoj kev sim tshuaj rau tsiaj. Txoj kev uas yuav kho tau tus kab mob AIDS los yeej yuav xub tshwm los ntawm txoj kev siv tsiaj los sim tshuaj uantej.
Lus qhia: Pom ib seem xwb
Tsis muaj teebmeem (safe), pheejyig, yoojyim tu, nrauvtawj txhawb: cov nqe lus no tawv jees tias yuav tsum cia siv tsiaj los sim tshuaj.
Zajlus Camtheej
Kev Sim Tshuaj Rau Tsiaj
Kev nrhiav tshuaj los ntawm tsiaj yeej pab ntau tibneeg lawm ntau. Yog tsis muaj kev tsim tshuaj rau tsiaj ces peb yeej nrhiav tsis cov tshuaj tivthaiv Polio thiab cov pab rau jhav qabzib. Txawm muaj tej kev pab tau tibneeg zoo baum li no los ib cov neeg tseem tsis pom zoo siv tsiaj los sim tshuaj. Zajlus no yuav sau txog txoj kev zoo uas siv tsiaj los sim tshuaj.
Kev sim tshuaj rau tsiaj pab cov tub txawg kom lawv muaj chaw sim tshuaj thiab tsim tau tshuaj tshiab. Liab thiab luav muaj roj tsha khiav dejnum xws li tibneeg. Nov ua chaw rau cov tub txawg sim cov tshuaj tshiab seb cov tshuaj pab tau li cas. Yog cov tshuaj tshiab ua num tsis zoo rau tsiaj ces lawv tsis zoo siv rau tibneeg.
Kev siv tsiaj los sim tshuaj pheejyig. Nws muaj tsiaj ntau rau kev sim tshuaj vim tsiaj raug yug thiab raug tu yoojyim. Yog siv tibneeg los sim tshuaj ces yuav kim heev thiab yuav ua teebmeem ntau yam.
Ntau leej neeg cam tias kev siv tsiaj los sim tshuaj tsis yog ib yam zoo rau tsiaj: pheem heev. Qee lub samthawj tej lus hais no yeej yog qhov tseeb. Tiamsis nws yuav pheem tshaj no yog peb muab tshuaj los sim rau tibneeg, sim rau menyuam yaus, los cia tus neeg tuag vim peb tsis paub zoo txog hom tshuaj ntawd. Dhau li no, tej kev cai hauv ntau lub teb chaws yeej tswv tsis pub ua pheem rau tej tsiaj uas yuav coj los sim tshuaj no.
Cov tsis pom zoo txog txoj siv tsiaj los sim tshuaj tseem hais wiv tias cov tshuaj uas peb sim zoo rau tsiaj yeej tsis zoo rau tibneeg. Lawv tawv tes rau tej tshuaj uas raug rho tawm, tsis pub muag wiv vim cov tshuaj ntawd ua mob lwm rau tibneeg (side effects). Tseeb tiag, tsiaj tej roj tsha yeej tsis zoo kiag li tibneeg li, tiamsis peb yeej kawm paub lawm tias ib co tsiaj muaj cov uas zoo xws li tibneeg li es cov nov yuav txuas tau rau tibneeg.
Cov neeg uas taujxub txog tsiaj muaj cai (animal rights) hais tias peb tsis muaj kev teemtsum muab tsiaj los sim tshuaj lawm vim peb yeej paub txog tej tshuaj no ntau ntau lawm. Txawm li ntawd los tej kab mob tshiab yeej tshwm txhua xyoo es peb yuav tsum muaj kev cheemtsum tsim tshuaj tshiab.
Kev siv tsiaj los sim tshuaj yeej yuav muaj nyob hauv lub qabntuj no. Peb yuav tau ua tibzoo saib xyuas tej tsiaj: luj lawv tej kev txomnyem nrog tej yam uas zoo los ntawm lawv.
Lus qhia: pom ob seem
Seem zoo Seem tsis zoo
Muaj chaw sim/tsim tshuaj Pheem rau tsiaj
Pheejyig Tsiaj muaj cai
Tu tsiaj yoojyim rau kev sim tshuaj Tshuaj sim tsiaj tsis zoo
Nrauvtawj txhawb/pomzoo Ua neeg mob lwm yam
Muaj cai tswj kev siv tsiaj Tsis cheemtsum lawm
Tseem cheemtsum
Kab mob tshwm wiv txhua xyoo
Xauslus: yuav tsum muaj kev siv tsiaj los sim tshuaj mus wiv, tiamsis yuav tau xyuas tej tsiaj kom zoo.