Zauv Hmoob yog ib yam uas peb poob qab deb heev. Peb yuav tsis tsim kom caum tau lwm haiv neeg, tiamsis peb yuav ua kom peb muaj tej yam yoojyim rau peb siv. Yog leej twg muaj tswvyim es yuav tsim kom siab dua no los kuj hajyam zoo xwb.
Livxwm:
Xyoo 1370, lolus “million” tau tsim rau lus Akiv (English) thiab 10 xyoo tomqab ntawd mam muaj lolus “trillion”. Niaj hnub no lawv tus najbawb loj tshaj yog “centillion” uas muaj 303 lub waiv. Xyoo 1992, leeskais Lee Thao (Nyiajlis Thoj) tau tawm ib lub tswvyim los nrhiav lus rau peb Hmoob cov najbawb loj. Nws siv tus qauv raws li Mekas tus vim peb Hmoob yeej suav li Mekas tus qauv, tsuas yog peb tsis tsim lus wiv xwb. Txij li xyoo 1992 los, cov leeskais qhia ntawv Hmoob hauv lub nroog Minneapolis yeej siv tus qauv no. Peb cia siab tias thaum sawvdaws paub lawm, peb sawvdaws yuav nrog siv. Thaum coob leej siv lawm, nws thiaj yuav ciaj ua Hmoob li tug.