Lusqhia: Pajhuam las. Pajhuam las yuav tsum muaj yam tsawg 3 tug las uake. Pajhuam las tsis dhos los tau.

Pajhuam las tshwmsim rau xyoo 1997 nyob Edison High School, lub nroog Minneapolis, xeev Minnesota. Thaum leeskais Nyiajlis Thoj pheej qhia kev sau ntawv thiab kev sau pajhuam rau nws cov meyes, nws nco tias Blog muaj ntau yam pajhuam. Nov ua rau nws tsim hom pajhuam las. Pajhuam las mas sau tsis yoojyim , tiamsis nws yuav pab cov meyes tshawb lawv cov lus Hmoob kom toob thiab kom ntau. Yog tus meyes twg sau tau pajhuam las ces tus ntawd yeej paub lus Hmoob ntau.

Siab Txivneej

By Lee Thao 1997

Txivneej lub siab…

Xuav xuj xib        tsis tso tseg

Xawb xawv xes    li loj liab

Taub taus tiag      yos yws yeej

Leeb lees leej        yeej yuav yuav

Puab pua puav       pe pes peg

Tsuav tsuab tseg  tsis tso tsev

Hes hes hej…

Lub jiab lus ntawm zaj no muaj li nram qab no.

Txivneej lub siab,  nws xuav kujkaub thiab tsis tso tseg. Nws xawb cuag li niag txiv thais liab. Nws twv los twv (taub lus Blog) thiab nws yws kom yeej. Nws leeb (lus Blog) tias nws yov yuav. Nws xiab nyiaj thiab pe tsis so. Thaum tau gaus rau hauv nws lub tsev lawm ces nws luag nrov nrov.

Lus qhia: Pajhuam las

QAIB-SAM

By Lee Thao

Qaib yuas qaib,   nej twb tsis paub

Quaj quj qaub     nti ntuj ntas

Neeg nias nam   de duj dob

Hlais hlo hlab      nej nuj noob

Jaj joos jej          nej nuj nav

Luag luag las      so soj saib

Cia cia cia       rog ruj roj

Zuag zog zoj    hlais hlawv hlo

Tas li nrho xwb tiag !

Lub jiab lus zaj no hais li no.

Ib tug neeg nroo rau qaib tias qaib twb tsis paub dabtsi. Qaib quaj qib qaub thiab nti nti, tuam tuam. Neeg nias ntho muab qaib dob plaub thiab hlais kiag lawv lub noob. Qaib mas jaj, joos, thiab yuag tas. Neeg luag whi saib thiab cia kom qaib rov rog. Thaum qaib rog lawm, neeg cia li zuag kiag qaib thiab muab qaib tua kiag ces qaib txoj sia tas kiag lawm xwb.

Hais txog txoj kev sam tsiaj ces Hmoob sam peb hom tsiaj raws li kuv paub: qaib, bua, thiab nees. Sam qaib thiab sam bua ces hlais hlawv hlo xwb tiag, tiamsis sam nees mas siv sijhawm ntev. Hmoob muab tsuas ntoo tsoo nees cov hlab xwb mas nees sab tiag tiag: ib ce hws tas ib ce hws tuaj. Txoj kev sam tsiaj no tsimnyog peb muab tso tseg lawm. Hmoob Mekas tsis sam tsiaj lawm. Ua li nej cov nyob lwm qhov chaw puas tau tso tseg?